Payal Unadkat

માનું છું

ગઝલને છંદમાં ઢાળી શકું સૌભાગ્ય માનું છું.
નથી એ પ્રાસ ખાલી ભાવનું સાતત્ય માનું છું.

લખાવે લાગણીના ગીત શબ્દોનો સહારો લઇ,
કવનમાં સૂર આપે એમને આરાધ્ય માનું છું.

ભલે ગાડી ઝરૂખાં સાહ્યબી સુવર્ણ લલચાવે,
જરા પરવાહ કરતાંને જ મારું હાસ્ય માનું છું.

મળે કિંમત સમર્પણની સબંધોમાં ન આશા છે,
ગઝલના શેર પરની વાહવાહી દ્રવ્ય માનું છું.

સફેદી વાળની ને આંખના ઊંડાણ શોભા છે,
કરચલી ભાલની મારી સહજ લાવણ્ય માનું છું.

સતત અવહેલનાના મારથી એકાંતને ભેટી,
મળી જે ભીડ શબ્દોની ખરું સૌજન્ય માનું છું.

અલગ અંદાજ છે મારો અલગ છે માન્યતા મારી,
મળ્યું હૈયે લગાડીને જીવું એ ભાગ્ય માનું છું.

-પાયલ ઉનડકટ

Categories: Payal Unadkat

Leave a Reply