Sense stories / बोध कथाए

ઈસપની એક બોધકથા

એક વાર એક ગરુડ એક શિકારીએ બિછાવેલી જાળમાં ફસાઈ ગયું. ગરુડ જ્યાં ફસાયું હતું તેની નજીક જ એક ખેતરમાં એક મજૂર કામ કરી રહ્યો હતો. તેને એ સુંદર પક્ષીની દયા આવી ગઈ. તેણે એ ગરુડને બચાવી લીધું. ગરુડે આંખો થકી તે મજૂરનો આભાર માન્યો.

થોડા દિવસ પછી તે ખેડૂત એક જર્જરિત દીવાલને અઢેલીને બેઠો બેઠો થાક ઊતારી રહ્યો હતો. એ વખતે અચાનક પેલું ગરુડ ત્યાં ધસી આવ્યું. તેણે ખેડૂતના માથા પર તડકાથી બચવા બાંધેલું કપડું ખેંચી લીધું અને થોડી ઊંચાઈએ ઊડવા માંડ્યું.

ખેડૂત અકળાઈ ગયો. તેને અફસોસ થયો કે મેં એ દિવસે આ ગરુડને બચાવ્યું અને આજે તે મારું માથું ઢાંકવાનું કપડું છીનવીને ભાગ્યું. ખેડૂત ગરુડની પાછળ દોડ્યો. એ જ વખતે પેલી જર્જરિત વિશાળ દિવાલ તૂટી પડી!

ખેડૂતને સમજાયું કે હકીકતમાં એ ગરુડે તેનો જીવ બચાવીને પોતાના ઉપકારનો બદલો વાળ્યો હતો.

આ ઈસપ કથા પરથી એ બોધ મળે છે કે કોઈ હિતેચ્છુ માણસની સારા હેતુથી કહેવાયેલી વાત કે કરાયેલી ચેષ્ટા કડવી લાગે ત્યારે તેને દુશ્મન ગણીને પ્રતિક્રિયા આપવાને બદલે તેનો હેતુ સમજવો.

સાભાર : ઈસપની બોધકથાઓ

Leave a Reply