Payal Unadkat

અહમનો ધુમાડો ઉડાડો ગગનમાં

(લગાગા×4)

અહમનો ધુમાડો ઉડાડો ગગનમાં,
કરો વાવણી વ્હાલની થોડી મનમાં,

ખર્યાં પાનની વાત પકડી ફરો શું!
વધાવી લો કૂંપળ ઘણી છે ચમનમાં,

સ્વજનનાં દીધેલાં ઝખમ સાચવીને,
મઢાવો કલમથી તમારાં કવનમાં,

પ્રસિદ્ધિ છતાંયે આ મન ઝંખતું’તું,
તું કારો કરે મિત્ર એવો વતનમાં,

ભલે મીર મારો દમામી અદાથી,
છે તાકાત જગ જીતવાની નમનમાં,

ના શ્રદ્ધા પ્રભુ પર ના ભક્તિ ગમે છે,
મજા મેળવે શું હરિના ભજનમાં!

કરું એ વિનંતી ના ફૂલો મુકાવો,
ગઝલની કિતાબો રખાવો કફનમાં.

-પાયલ ઉનડકટ

Categories: Payal Unadkat

Leave a Reply