Payal Unadkat

ઝાંખી છે

(ગાગાગાગા ગાગાગાગા ગાગાગાગા ગાગાગા)

અગણિત એવી ઈચ્છા મનમંદિરમાં સ્થાપી રાખી છે,
શબ્દોમાં ઉતરી એ જીવનની આછેરી ઝાંખી છે,

ઊગે ના દિવસ જેના વિના ને આથમતો પણ છે,
ગીત ગઝલને મેં શ્વાસે શ્વાસે કંડારી નાખી છે,

હરપળ જીવન રંગીન કરી ઇન્દ્રધનુષી રંગ ભરે,
ઉદાસીને દૂર કરે ગીત ગઝલ જાણે સાકી છે,

મીઠા વેણ જ લાગે વ્હાલા હોય ભલેને વરખ ચડ્યા,
ગમતી ના ખાવી એને શિખામણ કડવી ફાકી છે,

તારા આગમન પછી વરસે અનરાધાર મેહુલિયો,
એ આશાએ વિજળીને પણ મેં અનિમેષ તાકી છે,

આવોને શ્યામ હવે મારું મંદિર પાવન કરવાને,
આંખલડી મારી તો અનહદ જોને કેવી થાકી છે,

શામળિયા સંગ મડાગાંઠ મન અંતરની બાંધી તો,
બંધ નયને પણ થાતી એની અનૂપમ ઝાંખી છે.

-પાયલ ઉનડકટ

Categories: Payal Unadkat

Leave a Reply