Payal Unadkat

આપી જુઓ

(ગાગાલગા×4)

ભાંગી પડેલી ભીંતને આધાર તો આપી જુઓ,
જડતા ભરેલી રીતને પડકાર તો આપી જુઓ,

પ્રીતમ વસે પરદેશ જેનો જાગતી જે રાતભર,
એ પ્રાણ પ્યારીને નયન પલકાર તો આપી જુઓ,

જીવન સફરની દોડમાં હારી જવું હોતું રહે,
નિર્જીવ થયું છે જે હ્રદય થડકાર તો આપી જુઓ,

લાલચ બતાવી આપશે રાવણ સરીખી તક બધી,
સમજણ ધરી સમજી એને જાકાર તો આપી જુઓ,

ગીતા પઢો કે ઉપનિષદ ચાહે પઢી લો વેદને,
અનહદ ભરોસાની તમે વણજાર તો આપી જુઓ,

નાની અમસ્તી વાત પર રુઠી અને ચાલ્યા ગયા,
એ છોડ છે લજ્જા તણો લલકાર તો આપી જુઓ,

શ્રધ્ધા અને આ માનતા તો શ્વાસની જીવા દોરી,
આપી દિલાસા એક બે દરકાર તો આપી જુઓ.

-પાયલ ઉનડકટ

Leave a Reply